வெற்றியையும் தோல்வியையும் சமமாக ஏற்றுக்கொள்ளப் பழகிக்கொள்ள வேண்டும் என்றும், பின்னடைவுகளில் இருந்து பாடம் கற்றுக்கொண்டு வாழ்க்கையில் தொடர்ந்து முன்னேற வேண்டும் என்றும் சென்னை காரப்பாக்கம் கேசிஜி தொழில்நுட்பக் கல்லூரி பட்டமளிப்பு விழாவில் தமிழ்நாடு அண்ணா மேலாண்மை மற்றும் பயிற்சி நிறுவனத்தின் தலைமை இயக்குநர் டாக்டர் ஜெ. ராதாகிருஷ்ணன் ஐஏஎஸ் மாணவர்களுக்கு அறிவுறுத்தினார்.

சென்னை காரப்பாக்கத்தில் உள்ள கேசிஜி தொழில்நுட்பக் கல்லூரியின் 24-வது பட்டமளிப்பு விழா கல்லூரியின் கலையரங்கில் விமரிசையாக நடைபெற்றது. இதில் இளநிலை (UG), முதுநிலை (PG) மற்றும் முனைவர் (Ph.D.) படிப்புகளை வெற்றிகரமாக நிறைவு செய்த 560 பட்டதாரி மாணவர்களுக்குச் சிறப்பு விருந்தினராகக் கலந்துகொண்ட டாக்டர் ஜெ. ராதாகிருஷ்ணன் ஐஏஎஸ் பட்டங்களை வழங்கி வாழ்த்தினார்.

இந்நிகழ்ச்சியில் ஹிந்துஸ்தான் கல்வி நிறுவனங்களின் தலைவர் டாக்டர் ஆனந்த் ஜேக்கப் வர்கீஸ், கேசிஜி தொழில்நுட்பக் கல்லூரியின் இயக்குநர் டாக்டர் அன்னி ஜேக்கப், பொறுப்பு முதல்வர் டாக்டர் ஜி. பிரபாகரன் மற்றும் இந்திய அரசின் மின்னணுவியல் மற்றும் தகவல் தொழில்நுட்ப அமைச்சகத்தின் (MeitY) தரநிலைப்படுத்தல், சோதனை மற்றும் தரச் சான்றிதழ் (STQC) இயக்குநரகத் தலைமை இயக்குநர் எம். வெள்ளைப்பாண்டியன் உள்ளிட்ட பலர் கலந்து கொண்டனர்.

மாணவர்கள் கற்றுக்கொள்வதை ஆழமாகப் புரிந்துகொள்ள வேண்டும். விடாமுயற்சியுடன் செயல்படுதல், குழுவாக இணைந்து பணியாற்றுதல் மற்றும் வாழ்நாள் முழுவதும் புதிய விஷயங்களைக் கற்றுக்கொள்பவர்களாகத் திகழ வேண்டும்.

கணினிகளின் வருகைக்குப் பிறகு மனித சமுதாயத்தில் உருவாகும் அடுத்த மிகப்பெரிய மாற்றமாகச் செயற்கை நுண்ணறிவு (Artificial Intelligence) உருவெடுத்துள்ளது. பட்டதாரி மாணவர்கள் தொழில்நுட்பத்தைக் கற்றுக்கொள்ளவும், புதிய கண்டுபிடிப்புகளை உருவாக்கவும், தங்களது தனிப்பட்ட மற்றும் தொழில்முறை வளர்ச்சியை அடையவும் கிடைத்த வாய்ப்பாக இதைப் பயன்படுத்திக் கொள்ள வேண்டும்.

வாழ்க்கையில் வெற்றியையும் தோல்வியையும் சமமான மனநிலையோடு ஏற்றுக்கொள்ளப் பழக வேண்டும். பின்னடைவுகள் சந்திக்கும்போது சோர்ந்துபோகாமல் அதிலிருந்து பாடம் கற்றுக்கொண்டு முன்னேற வேண்டும். தங்களது கல்விப் பயணத்திற்காகப் பல்வேறு தியாகங்களைச் செய்த பெற்றோர், பெரியவர்கள் மற்றும் நண்பர்களை வாழ்க்கையில் ஒருபோதும் மறந்துவிடக் கூடாது, என அவர் மாணவர்களிடையே நெகிழ்ச்சியுடன் வலியுறுத்தினார். சிறப்பு விருந்தினரின் ஊக்க உரையையும், பட்டங்களையும் பெற்ற பட்டதாரி மாணவர்கள் மற்றும் அவர்களது பெற்றோர் அளவற்ற மகிழ்ச்சி அடைந்தனர்.