அமெரிக்க அதிபர் டிரம்பின் 15 அம்ச காசா அமைதித் திட்டத்தை நிராகரித்த இஸ்ரேல் பிரதமர் நெதன்யாகு, பாலஸ்தீன தனி நாடு உருவாக்கப்படுவதை ஒருபோதும் அனுமதிக்க முடியாது எனத் தெரிவித்துள்ளார்.

அமெரிக்க அதிபர் டொனால்ட் டிரம்ப் நிர்வாகத்தின் பிரதிநிதிகள் மற்றும் அமைதிக்குழுவால் முன்மொழியப்பட்ட 15 அம்ச காசா அமைதித் திட்டத்தை (Gaza Peace Plan) இஸ்ரேல் பிரதமர் பெஞ்சமின் நெதன்யாகு அதிகாரப்பூர்வமாக நிராகரித்துள்ளார். மேலும், காசாவிலோ அல்லது மேற்குக் கரையிலோ (West Bank) பாலஸ்தீனத் தனி நாடு அமைக்கப்படுவதை ஒருபோதும் அனுமதிக்க முடியாது என்றும் அவர் திட்டவட்டமாகத் தெரிவித்துள்ளார்.

ஜெருசலேமில் நடைபெற்ற இஸ்ரேலிய அமைச்சரவைக் கூட்டத்தில் தொடக்க உரையாற்றிய பிரதமர் நெதன்யாகு, அமெரிக்கா முன்வைத்த 15 அம்ச வரைவு ஆவணத்தை இஸ்ரேல் நிராகரிப்பதாகத் தெளிவுபடுத்தினார். ஹமாஸ் அமைப்பு போலித்தனமாக இல்லாமல், கனரக மற்றும் இலகுரக ஆயுதங்கள் உட்பட அனைத்து ஆயுதங்களையும் முழுமையாக ஒப்படைத்துத் தங்களை முழுமையாக ஆயுதபாணியற்ற இயக்கமாக (Disarmament) மாற்றும் வரை, காசாவிலிருந்து இஸ்ரேலியப் பாதுகாப்புப் படைகள் (IDF) ஒரு மில்லிமீட்டர் கூடப் பின்வாங்காது என்றும் அவர் உறுதியாகக் கூறினார்.

முன்னதாக, அமைதித் திட்டத்தின் கீழ் ஹமாஸ் ஆயுதங்களை ஒப்படைக்க ஒப்புக்கொண்டுள்ளதாக அமெரிக்க அதிபர் டிரம்ப் அறிவித்திருந்த நிலையில், அதற்கு மாறாக இஸ்ரேலின் பாதுகாப்பு நலன்களில் எந்தச் சமரசமும் செய்ய முடியாது என நெதன்யாகு பதிலளித்துள்ளார். “நான் பிரதமராக இருக்கும் வரை, காசாவிலோ அல்லது மேற்குக் கரையிலோ பாலஸ்தீன அரசு அமைக்கப்படவே முடியாது” என்று மீண்டும் வலியுறுத்தியுள்ள அவர், நட்பு நாடான அமெரிக்காவின் அழுத்தங்களுக்கு நடுவிலும் இஸ்ரேலின் பாதுகாப்பை மட்டுமே முதன்மையாகக் கொண்டு முடிவுகள் எடுக்கப்படும் என்றார். நெதன்யாகுவின் இந்த அதிரடி நிலைப்பாட்டிற்கு அவரது தீவிர வலதுசாரி கூட்டணி தலைவர்கள் வரவேற்பு தெரிவித்துள்ளனர்.