திமுக முன்னாள் அமைச்சர் எ.வ.வேலு மீதான வழக்கு அரசியல் பழிவாங்கும் நடவடிக்கை அல்ல என சென்னை உயர் நீதிமன்றத்தில் லஞ்ச ஒழிப்புத்துறை பதில் மனு தாக்கல் செய்துள்ளது.

திமுக முன்னாள் அமைச்சர் எ.வ.வேலுவுக்கு எதிராகத் தொடரப்பட்டுள்ள சொத்துக் குவிப்பு மற்றும் முறைகேடு வழக்கு எவ்வித அரசியல் பழிவாங்கும் நடவடிக்கையும் அல்ல என்றும், உரிய முகாந்திரங்கள் மற்றும் ஆதாரங்களின் அடிப்படையிலேயே வழக்கு பதிவு செய்யப்பட்டுள்ளது என்றும் சென்னை உயர் நீதிமன்றத்தில் லஞ்ச ஒழிப்புத்துறை (DVAC) அதிரடியாகப் பதில் மனு தாக்கல் செய்துள்ளது.

வருமானத்திற்கு அதிகமாகச் சொத்து சேர்த்தது மற்றும் முறைகேடுகளில் ஈடுபட்டதாகக் கூறப்பட்டுத் தொடரப்பட்ட லஞ்ச ஒழிப்புத்துறை வழக்கை ரத்து செய்யக் கோரி, திமுக முன்னாள் அமைச்சர் எ.வ.வேலு தரப்பில் சென்னை உயர் நீதிமன்றத்தில் மனு தாக்கல் செய்யப்பட்டிருந்தது.

அந்த மனுவில், அரசியல் உள்நோக்கத்துடனும் பழிவாங்கும் எண்ணத்துடனும் தன் மீது பொய்யான வழக்கு புனையப்பட்டுள்ளதாக அவர் வாதிட்டிருந்தார்.இந்த மனு உயர் நீதிமன்றத்தில் விசாரணைக்கு வந்த நிலையில், லஞ்ச ஒழிப்புத்துறை சார்பில் விரிவான பதில் மனு தாக்கல் செய்யப்பட்டது. அதில், “முன்னாள் அமைச்சர் வேலு மீதான இந்த நடவடிக்கை முற்றிலும் சட்ட விதிகளுக்கு உட்பட்டு, ஆரம்பக்கட்ட விசாரணையில் கிடைத்த வலுவான ஆதாரங்களின் அடிப்படையிலேயே எடுக்கப்பட்டுள்ளது.

இதில் எவ்வித அரசியல் உள்நோக்கமோ அல்லது தனிப்பட்ட பழிவாங்கும் நடவடிக்கையோ துளியும் இல்லை” என்று திட்டவட்டமாகத் தெரிவிக்கப்பட்டுள்ளது.மேலும், வழக்கில் முறையான ஆவணங்கள் மற்றும் சாட்சிகள் உள்ளதால், வழக்கின் விசாரணையைத் தடுத்து நிறுத்தும் வகையில் தாக்கல் செய்யப்பட்டுள்ள அவரது மனுவைத் தள்ளுபடி செய்ய வேண்டும் எனவும் லஞ்ச ஒழிப்புத்துறை நீதிமன்றத்தில் வலியுறுத்தியுள்ளது. லஞ்ச ஒழிப்புத்துறையின் இந்த அதிரடி பதில் மனு தமிழக அரசியல் வட்டாரத்தில் பரபரப்பை ஏற்படுத்தியுள்ளது.