காங்கிரஸ் தலைவர் மல்லிகார்ஜுன கார்கே மேடை ‘சுத்திகரிப்பு’ செய்யப்பட்டதைக் கண்டித்து நாளை தமிழகத்தின் அனைத்து மாவட்டத் தலைநகரங்களிலும் சத்தியாகிரகப் போராட்டம் நடைபெறும் என அறிவிக்கப்பட்டுள்ளது.
அகில இந்திய காங்கிரஸ் கமிட்டி தலைவர் மல்லிகார்ஜுன கார்கே கலந்துகொண்ட பொதுக்கூட்ட மேடை ‘சுத்திகரிப்பு’ செய்யப்பட்டதாகக் கூறப்படும் தீண்டாமை மற்றும் அவமதிப்புச் செயலைக் கண்டித்து, நாளை தமிழகத்தின் அனைத்து மாவட்டத் தலைநகரங்களிலும் அறவழியில் சத்தியாகிரகப் போராட்டம் நடைபெறும் எனத் தமிழக காங்கிரஸ் கமிட்டி தலைவரால் அதிகாரப்பூர்வமாக அறிவிக்கப்பட்டுள்ளது.
உத்தராகண்ட் மாநிலம் ஹல்த்வானியில் உள்ள ராம்லீலா மைதானத்தில் நடைபெற்ற காங்கிரஸ் பொதுக்கூட்டத்தில், கட்சியின் தேசியத் தலைவர் மல்லிகார்ஜுன கார்கே பங்கேற்று உரையாற்றினார். கூட்டம் நிறைவடைந்த பின்னர், குறிப்பிட்ட சில அமைப்பினர் கங்கை நீரைக் கொண்டும் ‘ஹவன்’ வளர்த்தும் அந்த மேடையைச் ‘சுத்திகரிப்பு’ செய்ததாகக் குற்றச்சாட்டுகள் எழுந்தன. பட்டியல் இனத்தைச் சேர்ந்த ஒரு தலைவரை அவமதிக்கும் நோக்கிலும், சாதியக் குறுகிய மனப்பான்மையுடனும் இந்த நடவடிக்கை மேற்கொள்ளப்பட்டுள்ளதாகக் காங்கிரஸ் தரப்பில் சுட்டிக்காட்டப்பட்டு நாடாளுமன்றத்திலும் எதிர்ப்புப் பதிவு செய்யப்பட்டது.
இச்சம்பவத்தைக் கண்டித்தும், ஜனநாயக விழுமியங்கள் மற்றும் சமூக நீதியைப் பாதுகாக்கவும் வலியுறுத்தித் தமிழ்நாட்டின் அனைத்து மாவட்டத் தலைநகரங்களிலும் நாளை மாவட்ட காங்கிரஸ் கமிட்டிகள் சார்பில் சத்தியாகிரகப் போராட்டங்கள் முன்னெடுக்கப்படவுள்ளன. இதில் காங்கிரஸ் கட்சியின் நாடாளுமன்ற, சட்டமன்ற உறுப்பினர்கள், மாவட்டத் தலைவர்கள் மற்றும் தொண்டர்கள் திரளாகப் பங்கேற்பார்கள் எனத் தெரிவிக்கப்பட்டுள்ளது.
