செங்கல்பட்டு சிறார் கூர்நோக்கு இல்லத்தில் இருந்து தப்பிச் சென்ற 11 பேரில், எட்டு சிறார்களை போலீசார் கைது செய்த நிலையில், தலைமறைவாக உள்ள இருவரை தீவிரமாக தேடி வருகின்றனர்.

🚔 காவலர்களை ஏமாற்றி தப்பிய சிறார்கள்

செங்கல்பட்டு பழைய கோட்டை வளாகத்தில் செயல்பட்டு வரும் சிறார் கூர்நோக்கு இல்லத்தில், சென்னை, சேலம், கோவை மற்றும் செங்கல்பட்டு உள்ளிட்ட பல்வேறு பகுதிகளைச் சேர்ந்த 18 வயதுக்குட்பட்ட 50க்கும் மேற்பட்ட சிறார்கள் தங்க வைக்கப்பட்டுள்ளனர். இவர்கள் பல்வேறு குற்ற வழக்குகளில் கைது செய்யப்பட்டு, நீதிமன்ற உத்தரவின்படி இங்கு தங்க வைக்கப்பட்டுள்ளனர்.

இங்கு தங்கியுள்ள சிறார்களுக்கு கல்வி மற்றும் தொழிற்பயிற்சிகள் அளிக்கப்பட்டு வருகின்றன. இந்நிலையில், கடந்த 14ஆம் தேதி இரவு காவலர்கள் கவனிக்காத நேரத்தில், நுழைவாயில் அருகே இருந்த சாவியை எடுத்து 11 சிறார்கள் தப்பிச் சென்றனர்.

🚆 மின்சார ரயிலில் தப்பியோடிய சிறார்கள்

சிறார்கள் தப்பிச் செல்வதை அறிந்த காவலர்கள் உடனடியாக அவர்களைத் துரத்திச் சென்றனர். இதில் ஒருவரை மட்டும் சம்பவ இடத்திலேயே பிடிக்க முடிந்தது. மற்றவர்கள் சென்னை கடற்கரை நோக்கிச் செல்லும் மின்சார ரயிலில் ஏறி தப்பிச் சென்றதாக கூறப்படுகிறது.

இதையடுத்து, செங்கல்பட்டு நகர காவல் நிலையத்தில் வழக்குப் பதிவு செய்யப்பட்டு, தனிப்படை அமைக்கப்பட்டது. சென்னை மற்றும் புதுச்சேரி உள்ளிட்ட பல்வேறு பகுதிகளில் போலீசார் தீவிர தேடுதல் வேட்டையில் ஈடுபட்டனர்.

⚖️ வழிப்பறி சம்பவங்களில் ஈடுபட்டது அம்பலம்

போலீசாரின் விசாரணையில், காரைக்கால் மற்றும் பிரம்மதேசம் உள்ளிட்ட பகுதிகளில் பதுங்கியிருந்த எட்டு சிறார்களை கைது செய்தனர். மேலும், தப்பிச் சென்ற சிறார்கள் சிலர் தப்பியோடும் வழியிலேயே வழிப்பறி சம்பவங்களில் ஈடுபட்டதும் தெரியவந்துள்ளது.

தற்போது தலைமறைவாக உள்ள மேலும் இரு சிறார்களை போலீசார் தொடர்ந்து தேடி வருகின்றனர். இந்தச் சம்பவம் செங்கல்பட்டு பகுதியில் பரபரப்பை ஏற்படுத்தியுள்ளது.