உலக குருதிக் கொடையாளர் தினத்தை முன்னிட்டு, செங்கல்பட்டு மாவட்ட குருதிக்கொடைப் பாசறையின் தன்னலமற்ற சமூக சேவையை பாராட்டி SRM குழுமம் சிறப்பு விருது வழங்கி கவுரவித்துள்ளது.
செங்கல்பட்டு மாவட்டத்தில் அவசர காலங்களில் ரத்தம் தேவைப்படும் நோயாளிகளுக்கு உடனடியாக குருதி வழங்கி உயிர்காக்கும் பணியில் குருதிக்கொடைப் பாசறை தொடர்ந்து ஈடுபட்டு வருகிறது. பல ஆண்டுகளாக சமூக நலன் கருதி செயல்பட்டு வரும் இந்த அமைப்பின் சேவையை பாராட்டும் வகையில், நேற்று (ஜூன் 12) நடைபெற்ற நிகழ்ச்சியில் SRM குழுமம் சார்பில் சான்றிதழ் மற்றும் விருது வழங்கப்பட்டது.
குருதி தானம் மூலம் பலரது உயிர்களை காப்பாற்றி வரும் தன்னார்வலர்களின் அர்ப்பணிப்பையும், மனிதநேய சேவையையும் பாராட்டி இந்த விருது வழங்கப்பட்டதாக நிகழ்ச்சி ஏற்பாட்டாளர்கள் தெரிவித்தனர்.
உலக குருதிக் கொடையாளர் தினத்தை முன்னிட்டு நடைபெற்ற இந்த நிகழ்வு, தன்னார்வ குருதிக் கொடையாளர்களுக்கு ஊக்கமளிப்பதுடன், பொதுமக்களிடையே குருதி தானத்தின் முக்கியத்துவம் குறித்த விழிப்புணர்வையும் ஏற்படுத்தியுள்ளது.
