சென்னை, பெங்களூரு மற்றும் அமராவதியை இணைக்கும் வகையில் 3 மாநிலங்களுக்கான புல்லட் ரயில் சேவை தேவை என ஆந்திர முதலமைச்சர் சந்திரபாபு நாயுடு வலியுறுத்தியுள்ளார்.

தமிழ்நாடு, கர்நாடகா மற்றும் ஆந்திரப் பிரதேசம் ஆகிய மூன்று தென் மாநிலங்களின் பொருளாதார வளர்ச்சி மற்றும் விரைவான போக்குவரத்து இணைப்பை உறுதி செய்யும் வகையில், சென்னை – பெங்களூரு – அமராவதி இடையே புல்லட் ரயில் திட்டத்தை உடனடியாகச் செயல்படுத்த வேண்டும் என்று ஆந்திர முதலமைச்சர் சந்திரபாபு நாயுடு மத்திய அரசுக்குக் கோரிக்கை விடுத்துள்ளார்.

தென்னிந்தியாவின் மூன்று முக்கிய தொழில் நகரங்களையும், தகவல் தொழில்நுட்ப மையங்களையும் ஒருங்கிணைக்கும் அதிவேகப் போக்குவரத்து கட்டமைப்பு குறித்து செய்தியாளர்களிடம் பேசிய ஆந்திர முதல்வர் சந்திரபாபு நாயுடு, “நாட்டின் பொருளாதார வளர்ச்சியில் தென்னிந்திய மாநிலங்கள் மிக முக்கியப் பங்காற்றி வருகின்றன. குறிப்பாக சென்னை, பெங்களூரு போன்ற பெருநகரங்களுடன் ஆந்திராவின் புதிய தலைநகரான அமராவதியை அதிவேகமாக இணைப்பது தற்போதைய காலத்தின் கட்டாயத் தேவையாகும்” என்று சுட்டிக்காட்டினார்.

தொடர்ந்து பேசிய அவர், “சென்னை – பெங்களூரு – அமராவதி ஆகிய மூன்று பிராந்தியங்களை உள்ளடக்கி இயக்கப்படும் அதிவேக புல்லட் ரயில் சேவை, தென்னிந்தியாவின் தொழில், வர்த்தகம் மற்றும் சுற்றுலாத் துறைகளில் மிகப்பெரிய புரட்சிகரமான மாற்றத்தை ஏற்படுத்தும். பயண நேரத்தை வெகுவாகக் குறைப்பதுடன், லட்சக்கணக்கான தொழில்முனைவோர், தகவல் தொழில்நுட்ப வல்லுநர்கள் மற்றும் பொதுமக்களுக்கு இது பெரும் வரப்பிரசாதமாக அமையும்” என்று குறிப்பிட்டார்.

எனவே, தமிழகம், கர்நாடகா மற்றும் ஆந்திரா ஆகிய 3 மாநிலங்களை இணைக்கும் இந்த அதிவேக புல்லட் ரயில் வழித்தடத் திட்டத்தை மத்திய ரயில்வே அமைச்சகம் முன்னுரிமை அடிப்படையில் பரிசீலித்து, விரைந்து நடைமுறைப்படுத்த நிதி ஒதுக்கீடு செய்ய வேண்டும் என அவர் மத்திய அரசை வலியுறுத்தியுள்ளார்.