கூவத்தூர் சுற்றுவட்டாரத்தில் அடிக்கடி ஏற்படும் மின்வெட்டால் பொதுமக்கள் அவதியடைந்து வரும் நிலையில், மின்வாரியம் உடனடி நடவடிக்கை எடுக்க வேண்டும் என கோரிக்கை எழுந்துள்ளது.

⚡ தொடர் மின்வெட்டால் மக்கள் அவதி

செங்கல்பட்டு மாவட்டம் கூவத்தூர் மற்றும் சுற்றுவட்டார பகுதிகளில் கடந்த சில தினங்களாக அடிக்கடி மின்வெட்டு ஏற்பட்டு வருகிறது. கூவத்தூர் மின்வாரிய கட்டுப்பாட்டில் கூவத்தூர், கடலூர், வடபட்டினம், தென்பட்டினம் உள்ளிட்ட 20க்கும் மேற்பட்ட கிராமங்கள் உள்ளன. மின் இணைப்பு, மின்மாற்றி உள்ளிட்டவற்றில் ஏற்படும் பழுதுகளால் தினமும் சுமார் 3 மணி நேரம் வரை மின்சாரம் துண்டிக்கப்படுவதாக பொதுமக்கள் தெரிவிக்கின்றனர். குறிப்பாக நள்ளிரவு நேரங்களில் ஏற்படும் திடீர் மின்தடையால் குழந்தைகள், முதியோர் மற்றும் நோய்வாய்ப்பட்டோர் சிரமப்படுகின்றனர்.

📞 புகார்களுக்கு உரிய நடவடிக்கை இல்லை?

மின்தடை ஏற்பட்டதும் மின்வாரிய அலுவலகத்திற்கு தகவல் தெரிவித்தாலும், உரிய நடவடிக்கை எடுக்கப்படுவதில்லை என கடலூர் பகுதி மக்கள் குற்றஞ்சாட்டுகின்றனர். கூவத்தூர் மின்வாரிய அலுவலகத்தை மொபைல் போன் மூலம் தொடர்புகொள்ள முயன்றாலும் அழைப்புகளை ஏற்காத நிலை இருப்பதாக கூறுகின்றனர். இதனால் மின்தடை மற்றும் பழுது தொடர்பான புகார்கள் மறுநாள் வரை சரிசெய்யப்படாமல் கிடப்பில் போடப்படுவதாகவும் மக்கள் தெரிவிக்கின்றனர். தொடர்ந்து ஏற்படும் மின்தடையால் வீட்டு உபயோகப் பணிகள், தொழில் மற்றும் விவசாய பணிகளும் பாதிக்கப்படுவதாக கூறப்படுகிறது.

🚨 அறுந்த மின்கம்பியால் விவசாயி உயிரிழப்பு

இந்நிலையில், நேற்று முன்தினம் உயரழுத்த மின்கம்பி அறுந்து கிடந்தது குறித்து மின்வாரியத்திற்கு தகவல் தெரிவிக்க முயன்றும், தொலைபேசி அழைப்பை ஏற்காததால் உரிய நேரத்தில் நடவடிக்கை எடுக்கப்படவில்லை என பொதுமக்கள் குற்றஞ்சாட்டுகின்றனர். இதற்கிடையே, அறுந்து கிடந்த மின்கம்பியை மிதித்த விவசாயி ஒருவர் உயிரிழந்ததாக கூறப்படுகிறது. இந்த சம்பவம் அப்பகுதி மக்களிடையே அதிர்ச்சியை ஏற்படுத்தியுள்ளது. மின்வெட்டு பிரச்னைக்கு நிரந்தர தீர்வு காணவும், புகார்கள் மீது உடனடியாக நடவடிக்கை எடுக்கவும் மின்வாரிய உயரதிகாரிகள் நடவடிக்கை எடுக்க வேண்டும் என பொதுமக்கள் வலியுறுத்தியுள்ளனர்.